Propozimi i ri i dhënë nga ndërmjetësi i OKB-së për emrin, Metju Nimic është Republika e Maqedonisë së Epërme. Ky propozim sot është shpalosur nga disa media greke të cilat kanë theksuar e propozimi i dhënë është me përmbajtje gjeografike, por që nuk i kënaq kërkesat greke, transmeton INA.
Maqedonia e Epërme do të përdoret deri sa të zgjasin negociatat për anëtarësim, kurse pas përfundimit të tyre, qytetarët përmes një referendumi do të kenë mundësi të deklarohen për dy çështje: A janë për anëtarësim në BE dhe për pranimin e emrit Republika e Maqedonisë së Epërme.
Këtë e parasheh propozimi i ri i negociatorit, Metju Nimic, njoftojnë mediat maqedonase duke u thirrur në burime diplomatike të involvuara në procesin e negociatave.

Në Spitalin e Qytetit në Shkup janë pranuar pesë qytetarë shqiptar me lëndime të rënda trupore. Dy prej tyre, në gjendje më të rëndë gjenden në kurim intensiv. Njëri prej të lënduarve duke përshkruar ngjarjen thotë se huliganët maqedonas në grup prej 100 deri 200 personash kanë sulmuar nëpër qytet, stacione autobusësh dhe kudo që kanë takuar shqiptarë.

“Kemi qenë në stacionin e autobusëve në rrugën ‘Jugodërvo’. Përnjëherë ka ndodhur ngjarja. Më shumë se 100-200 vetë kanë qenë dhe kanë goditur nga kanë mundur”, thotë njëri prej të lënduarve.
Dy prej të lënduarve janë nga Komuna e Haraçinës. Për këtë shkak kryetari i kësaj komune ka vizituar Spitalin e Qytetit për t’u informuar nga afër me gjendjen e viktimave.

“Definitivisht këto duhet të ndërpriten. Këto huliganë që bëjnë këto vepra, rrahin fëmijë, nxënës, nuk çon në të mirë dhe siç duket situata mund të eskalojë edhe në një krizë më të madhe. Kisha apeluar deri te organet përkatëse, njëherë e përgjithmonë të marrin fund këto ngjarje”, ka thënë për AL Sat-M Bastri Bajrami, kryetar i Komunës së Haraçinës.

Bashkimi Demokratik për Integrim (BDI) mbrëmë në Shkup ka mbajtur Konventën promovuese të kandidatit për kryetar të komunës së Çairit, Izet Mexhiti dhe këshilltarëve të kësaj komune. Në këtë Konventë është bërë edhe promovimi i këshilltarëve për Qytetin e Shkupit të cilës listë i prinë Qemal Musliu si dhe kandidatit të BDI-së për Qytetin e Shkupit, Artan Grubi.
Kryetari aktual i Çairit, Izet Mexhiti para të pranishmëve ka theksuar disa nga projektet e tij më të mëdha të realizuara në mandatin e tij, ndërsa ka porositur se në të ardhmen do të vazhdojë të punojë edhe më shumë. “Në fshatin që duket nuk duhet kallauzë, prandaj veprat flasin vetë. Të gjithë le ta dinë se Shkupi nuk mundë të jetë i tërë pa shqiptarët. Kur ka vend për Filipin ka vend edhe për Hasan Prishtinën, kur ka vend për Car Samolin ka vend edhe për Skëndërbeun”, ka thënë Mexhiti para të pranishmëve.

Ai ka renditur realizimin e projekteve për gasifikimin e Çairit si komuna e parë që do të gazifikohen në Shkup, ndryshimin e emrave të shkollave, vendosjen e përmendores së Hasan Prishtinës, ndërtimin e Sheshit “Skënderbeu”, rinovimin e shkollave dhe rrugëve etj, raporton Zhurnal.

Kandidati për kryetar të Shkupit, Artan Grubi ka theksuar se vjen nga një familje e vjetër e Shkupit dhe do të përpiqet maksimalisht që në Shkup të gjallërojë edhe më shumë frymën dhe kulturën shqiptare.
Lideri i BDI-së, Ali Ahmeti tha se arsyet pse duhet të votohen kandidatët e BDI-së janë të shumta, ndërsa Shkupi ka qenë në epiqendrën e kësaj partie duke ia kthyer atij frymëzimin shqip.

Rasti i policit maqedonas Joakim Trifunovski është rasti i parë që një maqedonas të dënohet me burg të përjetshëm, vepër e kryer ndaj dy shqiptarëve të vrarë nga Gostivari, Besnik Shehapi dhe Imran Memeti.
 Evidente deri më tani ishte që për vepra të këtilla të ndëshkohen vetëm shqiptarë, një gjë e njohur mirë për opinionin.
Vrasja e dyfishtë ndodhi më 28 shkurt në Gostivar, kur Trifunovski i cili nuk ka qenë në detyrë, me revolen zyrtare ekzekutoi për vdekje Besnik Shehapin dhe Imran Memetin. Sherri banal për parkimin e makinës, ka qenë motivi që polici të qëllojë për vdekje me armën zyrtare dy të rinjtë shqiptarë, ndërsa ngjarja asokohe shkaktoi hidhërim dhe protesta të banorëve shqiptarë të Gostivarit.

Ministri i Jashtëm turk, Ahmet Davutoglu, deklaron se Turqia nuk do të pranojë kërkesën e qeverisë shqiptare për kthimin e eshtrave të rilindasit shqiptar, Sami Frashëri.
Kryediplomati turk është cituar nga mediat turke duke thënë se Sami Frashëri është një thesar për Turqinë dhe gjithmonë do të qëndrojnë në Stamboll.
Më 20 shkurt “Todays Zaman", në versionin online shkruante se “Ministri i Jashtëm turk Ahmet Davutoglu ka refuzuar një kërkesë nga Shqipëria për t'u kthyer eshtrat e një osmani të shquar shqiptar të njohur për kontributin e tij të rëndësishëm në nacionalizmin turk"
Davutoglu shtoi se nuk do të ketë dallim në mes kërkesës për eshtrat e Mehmet Akif Ersyj, që është autor i himnit kombëtar të Turqisë dhe Sami Frashërit, duke theksuar rëndësinë e Samiut me identitetin kombëtar turk.
“Dashtë Perëndia, ai do të mbetet atje. Ai është thesari ynë”, citohet të ketë thënë ministri i Jashtëm turk.
Kryediplomati turk nuk përmendi nëse Ankaraja po planifikon të kthejë kokën e ish-Guvernatorit në Perandorinë Osmane, Ali Pashës, për të cilën thuhet se qeveria shqiptare ka bërë kërkesë zyrtare, transmeton Shqiptarja.com.
Kërkesa zyrtare e qeverisë shqiptare iu paraqit ministrit turk të Mbrojtjes gjatë vizitës së këtij të fundit pak ditë më parë në vendin tonë. Bisedën e pat konfirmuar për mediat turke Rifat Sait, deputet i Partisë së Kryeministrit Erdogan, Drejtësi dhe Zhvillim, i cili ishte një prej anëtarëve të delegacionit turk gjatë vizitës në Tiranë.
Në kuadër të 100 vjetorit të Pavarësisë, kryeministri Berisha u shpreh se qeveria shqiptare do të bënte gjithçka për kthimin e eshtrave të Sami Frashërit në Atdhe.

Zëvendëskryetari i Komisionit Evropian i obliguar për politikë ekonomike dhe monetare, Oli Ren, doli me parashikim dimëror ekonomik për vendet anëtare të Bashkimit Evropian, por edhe për kandidatët dhe një pjesë të vendeve nga "bota e tretë".  Komisioni parashikon rritje më të madhe ekonomike të Republikës së Maqedonisë në krahasim me BE-në dhe Eurozonën, informon MIA.
Me konstatimin se në vitin 2011 vendi i ynë ka pasur 2,8 për qind rritje, vitin e kaluar 0,0 për qind, KE-ja për këtë vit i parashikon 1,5 për qind rritje në krahasim me Bruto-prodhimin e vendit (BPV) të Republikës së Maqedonisë, ndërsa për vitin 2014 parashikimet janë që ai të jetë 2,5 për qind.
Sa për krahasim, parashikimet e Komisionit për Bashkimin Evropian janë vetëm 0,1 për qind rritje këtë vit dhe 1,6 për qind për vitin e ardhshëm, ndërsa Eurozona qëndron edhe më keq dhe parashikohet të mbetet në recesion me minus 0,3 për qind rritje për vitin 2013 dhe dalje nga recesioni për vitin e ardhshëm, respektivisht rritje e parashikuar prej plus 1,4 për qind nga BPV i Eurozonës.
Ajo në të cilën vendi i ynë qëndron më së keqi se të gjithë është përqindja e papunësisë, e cila në vitin 2011 ka qenë 31,4 për qind, vitin e kaluar 31,2 për qind, ndërsa për vitin 2013 dhe 2014 parashikohet rënie e saj në 30,7 për qind, ndërsa për vitin e ardhshëm përqindja e papunësisë të jetë saktë 30,0 për qind. Përqindja e papunësisë në Bashkimin Evropian, megjithatë, për këtë vit pritet të jetë 11,1 për qind, ndërsa për vitin e ardhshëm të bie për 0,1 për qind, ndërkaq në Eurozonë ka 12,1 për qind persona të papunësuar dhe po ashtu për vitin 2014 pritet që kjo përqindje të zvogëlohet për 0,1 për qind.
Po ashtu, Maqedonia keq qëndron edhe lidhur me deficitin publik, i cili vitin e kaluar ka qenë minus 3,8 për qind, këtë vit parashikuar në minus 3,5 për qind, ndërsa për vitin 2014 në minus 3,3 për qind nga BPV, që është në kundërshtim me marrëveshjen e BE-së. Megjithatë, Maqedonia është shumë para vendeve-anëtare të Unionit lidhur me borxhin publik, i cili vitin e kaluar ishte 31 për qind nga BPV, që këtë vit parashikohet të rritet deri 33,3 për qind, që në vitin 2014 të arrijë 35 për qind nga BPV.