Published On:20 June, 2011

Posted by Vnb-Snorki

Esteban Kambiaso është problemi i vetëm i trajnerit të Argjentinës Serxhio Batista, për sfidën e sotme ndaj Shqipërisë, në stadiumin “Monumental” të Buenos Airesit. Mesfushori i Interit nuk e ka kaluar plotësisht dëmtimin dhe tekniku argjentinas nuk kërkon ta rrezikojë, në pritje të ndeshjeve të Kupës së Amerikës.Ndërkohë, pjesa tjetër e skuadrës është e gatshme për të luajtur një miqësore, që është testi i fundit përpara nisjes së turneut kontinental më 1 korrik. Argjentinasit kanë që në vitin 1993 që nuk e fitojnë këtë kompeticion dhe këtë herë duan t’i shkojnë deri në fund. Është kjo arsyeja, përse vëmendja e tyre, më shumë se te miqësorja me Shqipërinë, është e përqendruar te ndeshja e startit ndaj Bolivisë më 1 korrik. “Argjentina është gjithnjë nën presion për të fituar, për shkak të historisë së saj, – deklaroi Havier Zaneti. – Për ne është një mundësi e mirë, duam të fitojmë për të gëzuar edhe tifozët tanë”, shtoi ai.Trajneri Batista pritet t’i provojë të gjithë futbollistët që ka në dispozicion për këtë miqësore, kjo edhe për shkak se ende i duhet të bëjë disa largime para nisjes së Coppa America. Në sulm do të luajë pa më të voglin dyshim Lionel Mesi, ndërsa pritet që partnerët e tij të jenë Higuain dhe Tevez.Ndërkohë, kombëtarja shqiptare ka mbërritur ditën e shtunë në Argjentinë dhe është akomoduar në hotel Kardales të kryeqytetit. Trajneri Josip Kuzhe ka në dispozicion një numër të kufizuar futbollistësh për këtë takim, duke qenë se mungojnë kryesorë të ekipit.Ndeshja Argjentinë-Shqipëri do të luhet sot në mbrëmje në orën 23.10 me orën shqiptare. Ajo përkon me Ditën e Flamurit në Argjentinë dhe pritet që në stadium të jetë një numër i konsiderueshëm tifozësh.