Published On:28 June, 2011
Posted by Vnb-Snorki
Shqiptarët e rinj të Zvicrës janë të pjekur për Serie A
Kasami aktualisht është pjesë e skuadrës së Palermos dhe po kërkohet nga shumë ekipe në Serie A. Sipas këtij sajti, në Serie A pa problem mund të luajnë edhe Xherdan Shaqiri, Granit Xhaka, Admir Mehmedi e Amir Abrashi. Të pesë këta futbollistë shqiptarë ishin pjesë e ekipit U-21 të Zvicrës, që zuri vendin e dytë në Kampionatin Evropian të mbajtur në Danimarkë. Madje ishin pjesa kyç, sidomos Xherdan Shaqiri, Admir Mehmedi e Granit Xhaka.
Zvicra në finale u mposht nga Përfaqësuesja e Spanjës me rezultatin 2:0. Pos futbollistëve shqiptarë janë përmendur edhe Steven Zuber, Timm Klose, Philippe Koch e Fabien Frei si futbollistë potencial për skuadrat italiane në edicionin e ri.
Ja vlerësimet e "Tuttomercatoweb" për katër shqiptarët që mund t'i bashkohen Pajtim Kasamit në Serie A.
Xherdan Shaqiri
Është njëri prej futbollistëve të rinj me famën më të madhe në futbollin evropian. Pos Romës, Shaqiri përcillet me vëmendje të madhe edhe nga Palermo, Fiorentina e Juventusi. Shaqiri mund të jetë futbollisti më i rëndësishëm për një ekip në Serie A. Kartoni i tij vlerësohet të kushtojë rreth dhjetë milionë euro nga skuadra e Baselit, që posedon atë.
Admir Mehmedi
Në fillim të këtij muaji debutoi me ekipin e parë të Përfaqësueses së Zvicrës. Titullar i padiskutueshëm të skuadra e Zuerichut, ku në edicionin e fundit shënoi dhjetë gola në 31 paraqitje. Pati paraqitje fantastike edhe në Evropianin U-21, duke shënuar gola kyç, si ai në gjysmëfinale kundër Çekisë. Vlera e kartonit të tij sillet rreth tre milionë euro.
Granit Xhaka
Po ashtu, me origjinë nga Kosova, siç janë edhe Shaqiri e Amir Abrashi. Ai është njëri prej futbollistëve që mund të luajë në çdo cep të mesfushës. Xhaka ka nisur të dalë në skenë, kurse këtë ia ka mundësuar edhe ftesa e seleksionuesit të Përfaqësueses A të Zvicrës, Ottmar Hitzfeldit. Interesim për Xhakën kanë treguar Udinese e Lazio, kurse Baseli mund ta lirojë atë për një dëmshpërblim prej pesë milionë eurosh.
Amir Abrashi
U transferua nga skuadra e Winterthurit te Grasshoppersi dhe qysh në vitin e parë dëshmoi se meriton të jetë një titullar i padiskutueshëm. Loja e tij ngjan me atë të Gennaro Gattusos në bazë të dinamikës dhe angazhimit gjatë tërë ndeshjes. Abrashi di të jetë edhe një asistues fenomenal.
