Published On:25 June, 2011
Posted by Vnb-Snorki
Flash: Junajted dëshiron Shnajderin dhe Modriçin
Sipas “Daily Star”, Ferguson dëshiron që në “Old Traford”, të sjellë mesfushorin holandez tek Interi, Vesli Shnajderi dhe Lluka Modriçin e Totenhemit.
Holandezi ka kohë që është cak i Junajtedit dhe transferimi i tij tek kjo skuadër është i mundshëm. Raportohet se Shnajder do t’i kushtojë Junajtedit 30 milionë euro. Objektiv tjetër i menaxherit Ferguson është edhe kroati i Totenhemit, Lluka Modriç.
Melo i zemëruar me Juven
Mesfushori i Juventusit, Felipe Melo është zemëruar kur ka dëgjuar lajmin se ai është i lidhur me një shkëmbim të tij me yllin e Liverpulit, Raul Meireles, raportojnë mediat britanike.
Braziliani edhe në të kaluarën ka qenë i lidhur për një shkëmbim në Arsenal, dhe kjo gjë ka irrituar tej mase Melon.
“Juve nuk ka treguar respekt në raport me mua. Të paktën kjo është përshtypja që unë kam marrë. Unë nuk jam një mjet që mund të përdorem për negocimi”, ka thënë ai.
Drogba s’largohet nga Çelsi
Menaxheri i ri i klubit të Çelsit, portugezi Andre Villas Boas, nuk do ta largojë sulmuesin Didie Drogban.
Sipas “Telegraph”, portugezi i ka lënë mundësinë e rinovimit të kontratës së sulmuesit nga Bregu i Fildishtë, pavarësisht faktit se në “Stamford Brixh” mund të zbresë sulmuesi i Portos, Falkao.
Mediat britanike kanë raportuar se Drogba gjatë kësaj vere do të ikën nga Londra, sidomos pas ardhjes së spanjollit Fernando Torres, mirëpo ekziston mundësia që reprezentuesi nga Bregu i Fildishtë ta vazhdojë karrierën te “blutë” e Londrës.
Drogba ka qenë i lidhur më një transferim në skuadrën tjetër angleze, Totenhem, por ai është edhe në shënjestër edhe të skuadrës italiane, Milan.
Mesi i papërmbajtshëm
Mesfushori i kombëtares së Shqipërisë, Elis Bakaj, disa ditë pas humbjes ndaj Argjentinës, ka thënë se Lionel Mesi ishte i papërmbajtshëm.
Argjentina mposhti Shqipërinë prej 4:0, në miqësoren e zhvilluar pak ditë më parë në River Plate.
“Mesi ishte i papërmbajtshëm. Nuk kam parë lojtar më të shpejtë. Ne momentin kur ai merrte topin ishte vështirë të ndalet”, ka thënë Bakaj.
Adebajor drejt Marsejës
Sulmuesi togolez, Emanuel Adebajor nuk është blerë nga Reali i Madridit dhe për këtë arsye do të detyrohet që të rikthehet tek Mançester Siti. Por, aty nuk ka hapësira dhe duke parë edhe marrëdhënien e tij me trajnerin Roberto Mançini, ai kërkon që të largohet. Për të kanë shfaqur interes disa ekipe, por Marseja duket se është më konkretja. Adebajor duket se është dakord për kalimin, me kusht që të ketë një vend të sigurtë si titullar në ekip. Për të blerë togolezin, Marsejës i duhen para dhe për këtë ka vendosur që të shesë mesfushorin Luço Gonzales. I vetmi problem për këtë transferim është paga e lartë e Adebajor, i cili përfiton plot 8 milionë euro në sezon.
Ujkani, midis Novares dhe Sampdorias
SAMIR UJKANI eshte ne qender te tratativave te Sampdorias.
Portieri shqiptar i Novares beri nje sezon te madh me fanellen piemonteze.
Drejtori sportiv, Pasquale Sensibile, do te donte ta merrte me vete te Sampdoria, por Novara nuk ka qellim te shese numrin nje te saj.
Alonso: Duhet të përpiqemi ta fitojmë çdo garë
Ngasësi i Ferrarit, Fernando Alonso, në prag të Çmimit të Madh të Valencisë, ka thënë se skuadra e tij duhet të bëjë përpjekje për të fituar në të gjitha garat e ardhshme.
“Tani është e vështirë për të fituar gara, por nuk ka dyshim se në Monako dhe Kanada kishim rastin për të fituar, ky është një fakt, nuk është një ëndërr. Kemi qenë në radhët e para në Montreal, kurse fitorja në Monako na iku për dhjetëra centimetra. Forma jonë është e mirë, jemi përmirësuar dukshëm dhe karakteristikat e garës në Valenci janë të ngjashme me dy garat paraprake. Ky është një rast i mirë për ne për të fituar”, ka theksuar Alonso. Spanjolli e pranon se gara për titullin e kampionit është bërë e vështirë. “Titulli është pak larg dhe është vështirë për t’u arritur. Rruga drejt titullit sivjet duket shumë e vështirë, sepse Fetel ka fituar po thuajse çdo garë. Ai ka pasur paraqitje të mira dhe ka arritur një shkëputje të madhe në pikë. Sidoqoftë, ne do të përpiqemi për t’ia bërë të vështirë Fetelit rrugën drejt titullit. Unë shpresoj se Meklareni dhe Ferrari do të mund t’i japin fund serisë pozitive të Red Bullit”, është shprehur tutje Alonso, duke shtuar: “Nëse ne do të kemi makinën më të mirë, ne edhe mund ta fitojmë titullin. Ka ende shumë gara për ta bërë kthesën e nevojshme. Për këtë arsye qëllimi ynë është që të përpiqemi të fitojmë çdo garë të ardhshme”. Alonso aktualisht zë pozitën e 5-të në renditjen e përgjithshme, me 69 pikë, me madje 92 pikë më pak se sa lideri, Sebastian Fetel.
Nadal: Kam fituar një vend në historinë e tenisit
Tenisti spanjoll, Rafael Nadal, në një intervistë për revistën spanjolle “ABC XL”, ka deklaruar se ka arritur të ketë një karrierë shumë më të mirë se sa ka mundur të ëndërroj.
“Në asnjë moment nuk dua të tingëlloj arrogant, por është më se e qartë se karriera ime sot është shumë më e mirë se sa e kam ëndërruar. Mendoj se tashmë e kam fituar një vend në historinë e tenisit, por nuk më takon mua të them se në cilin nivel”, ka thënë Nadal, duke shtuar: “Unë nervozohem shumë rrallë. Edhe pse tensioni i lojës është i madh, arrij ta mbajë kokën të qetë. Ju e dini se mund të fitoni dhe të humbisni gjatë një loje, por nëse nuk arrini t’i kontrolloni nervat, atëherë mundësitë që gjërat të shkojnë keq janë më të mëdha. Më i merituari për përgatitjen time mentale është xhaxhai im, i cili ka punuar shumë me mua në këtë drejtim”.
