Xherdan Shaqiri ka pasur presionin e të qenit yll i Kampionatit Evropian për grupmoshën U-21 në Danimarkë. Mirëpo, mesfushori 19-vjeçar fare nuk është treguar i ndikuar nga kjo barrë në ndeshjen e parë të tij në Evropian kundër nikoqires, Danimarkës. Ai ka shkëlqyer duke e udhëhequr skuadrën e tij drejt fitores.
Shaqiri, një lojtar me më shumë paraqitje në përfaqësuesen seniore se në atë U-21, ka treguar një performancë fenomenale duke realizuar golin e vetëm në fitoren 1:0 kundër Danimarkës, në Aalborg të shtunën mbrëma.
Shaqiri pranoi një top rreth 30 metra larg portës dhe me një depërtim kaloi gjysmën e skuadrës nikoqire dhe më pas shënoi gol nga brendësia zonës, gjersa luhej minuta e 47-të.
Mesfushori i Zvicrës, shtatë ditë pas barazimit që nxori me përfaqësuesen "A" të Zvicrës kundër Anglisë në "Wembley" (2:2), në eliminatoret për Evropianin 2012, sërish tregoi se është një yll që po vjen.
"Kishte shumë presion, mirëpo mua më pëlqen presioni dhe më pëlqen të luaj në një ngjarje të madhe si kjo. Unë jam i lumtur që kam ndihmuar skuadrën. Mendoj se çdo lojtar ndien presion kur nga Përfaqësuesja 'A' kthehet në atë U-21. Pritjet janë shumë të mëdha. Unë kam dashur të tregoja veten dhe jam i lumtur që kam bërë një gjë të tillë kundër Danimarkës. Jam i lumtur që shënuam fitore", ka thënë mesfushori i Baselit, Shaqiri.
Shaqiri ka luajtur si mesfushor ofensiv, ndërsa ka fituar vazhdimisht duelin me yllin danez të Ajaxit, Christian Eriksen.
"Danimarka ka lojtarë shumë të mirë, si Erikseni që luanë në përfaqësuesen e parë. Ne i kemi parë ata që janë plot kualitet, mirëpo ne ishim pak më të mirë. Edhe rezultati e tregon këtë. Kur fiton kundër nikoqires, atëherë ke shanse të mëdha për të arritur sukses. Ne kemi potencial të madh. Ne kemi pasur një performancë fenomenale dhe nëse vazhdojmë kështu kemi gjasa për të fituar titullin", ka thënë Shaqiri.
Për Zvicrën të shtunën mbrëma startuan tre shqiptarë, Shaqiri, Granit Xhaka e Admir Mehmedi. Po ashtu në pjesën e dytë u inkuadrua edhe Pajtim Kasami, derisa në bankën e rezervistëve ishte Amir Abrashi.
"Ishte një rezultat fenomenal për ne. Jo vetëm që arritëm të marrim tri pikë, por arritëm edhe të mos pranojmë gol. Ne luajtëm shumë mirë, krijuam shumë raste. E merituam fitoren", ka thënë Mehmedi.
Zvicra garon në Grupin A të Evropianit 2011 së bashku me Bjellorusinë, Danimarkën e Islandën. Ndeshjen e radhës do ta luajë të martën (18:00) kundër Islandës. <

About the Author

By Vnb-Snorki on 6:34 AM. Filed under Sport . Follow any responses to the RSS 2.0. Leave a response