Published On:23 February, 2013
Posted by Vnb-Snorki
Qendra tregtare ua ndalon hyrjen fëmijëve të zhurmshëm
Qendra tregtare “Dee Why Grand” në pjesën veriore të Sydneyt, që u premton argëtim familjeve të reja, e ka miratuar rregullën e re, pas ankesave rreth fëmijëve që dalin jashtë kontrollit.
Në vërejtjen nga administrata e qendrës shkruan: “Ndal. Prindër, ju lutemi të keni parasysh në qetësinë e klientëve tjerë. Fëmijët që bërtasin nuk do të tolerohen në qendër”.
Menaxherja e qendrës, Brenda Mulcahy, ka thënë se stafi dhe klientët ishin ankuar për fëmijët që “vrapojnë vërdallë” dhe “bërtasin” në sektorin e ushqimeve, që ndodhet afër pjesës së lojërave për fëmijët nën moshën pesëvjeçare.
Ajo ka thënë se fëmijët ishin nganjëherë aq të zhurmshëm, saqë britmat e tyre mund t’i dëgjonte edhe në zyre, që ndodhet shumë larg.
“Njerëzit e meritojnë që në qetësi të pinë çajin e tyre”, i ka thënë Mulcahy gazetës “Manly Daily”.
“Nënat duhet të jenë më të përgjegjshme. Ne kemi pasur aq shumë ankesa”. Ajo ka thënë se një pjesë e stafit i shmangej sektorit të ushqimeve, për shkak se zhurma ishte “e padurueshme”.
Një shenjë në të cilën fëmijëve u kërkohej të mos bërtisnin ishte bënë gjatë dhjetorit, por, pasi ishin bërë ankesa të reja, rregulla më e ashpër u miratua gjatë javës së kaluar.
Eksperti për çështje familjare, dr. Justin Coulson, ka thënë se ky ishte pasqyrim i një shoqërie që po bëhet tejet jotolerante ndaj fëmijëve të vegjël dhe prindërve.
“Secili që ka fëmijë e di se është shumë më siklet të dëgjosh fëmijën tënd duke bërtitur, sesa ta dëgjosh fëmijën e huaj duke bërtitur”, ka thënë ai.
Coulson ka thënë se refuzimi i fëmijëve të vegjël që bëjnë zhurmë është diçka e gabuar.
”Ekziston një mungesë e madhe e përkrahjes për prindërit”, ka thënë ai.
Tomiki Halai, baba i katër fëmijëve, ka thënë se ai kishte parë fëmijë “duke vrapuar pa kontroll” në qendër, por shumica e prindërve nuk e lejonin një gjë të tillë. “Prindërit duhet që t’i kontrollojnë fëmijët e tyre, por në fund të fundit, fëmijët janë fëmijë”.
Ndalimi i fëmijëve të zhurmshëm nga qendrat tregtare është përkrahur nga një numër i madh i lexuesve të gazetave australiane, derisa shumica kanë fajësuar prindërit.
“Më në fund po bëhet diçka për njerëzit që duan të mos i durojnë fëmijët që bërtasin dhe qajnë nëpër vende publike”, ka shkruar Sarah Coldwell në uebfaqen e gazetës “Herald Sun”.
Megjithatë, disa kanë theksuar se mund të mos ketë opsion tjetër për prindërit, duke e fajësuar qendrën tregtare.
“Kam një vajzë 4-vjeçare dhe ndonëse ajo është shumë e qetë, gjithçka ndryshon në supermarkete”, ka komentuar Carla Regan.
“Po të mos i vendosnin shitoret të gjitha sheqerkat në vendet ku mund të shihen prej fëmijëve, atëherë ne do ta kishim më të lehtë”.
